Gjatë protestës së zhvilluar para godinës së Kryeministrisë, aktivisti Ilir Xhemajli u ndal te tragjedia e fundit në Shkodër, ku një nënë e re dhe dy fëmijët e saj humbën jetën si pasojë e një zjarri në banesë. Ai kërkoi nga pjesëmarrësit që të mbanin një minutë heshtje në nderim të viktimave.
Në fjalën e tij, Xhemajli parashtroi kritika të forta ndaj qeverisë lidhur me menaxhimin e situatave emergjente. Ai vuri në dukje se tragjedia në Shkodër ndodhi për shkak se mungesa e infrastrukturës rrugore pengoi ndërhyrjen e forcave zjarrfikëse. Sipas tij, fondet e parashikuara për shërbimet zjarrfikëse dhe mjetet ajrore nuk po përdoren në mënyrën e duhur.
“Sot një tragjedi tjetër ndodhi në Shkodër. Dy engjëj së bashku me nënën e tyre janë bashkuar me zotin lart, sepse nuk kishte rrugë që të shkonte zjarrfikësja. Lekët vidhen për gjoja zjarrfikëse dhe avionë që do na shuanin zjarret”, u shpreh aktivisti.
Krahas situatës në Shkodër, Xhemajli ndau me të pranishmit një përvojë personale nga një takim në qytetin e Lushnjës. Ai rrëfeu bisedën me një grua, e cila i kërkoi të vazhdonte angazhimin dhe të mos dorëzohej. Aktivisti e krahasoi situatën aktuale politike me një formë “gjenocidi” ndaj shqiptarëve, duke kërkuar ndryshim rrënjësor të sistemit dhe duke drejtuar akuza të rënda ndaj qeverisë, të cilën e cilësoi si përgjegjëse për dështimet e përditshme të qytetarëve.