Një protestë e zhvilluar sot në Maliq kundër planit për shkrirjen e Bashkisë së Maliqit dhe bashkimin e saj me Bashkinë e Korçës është shoqëruar me incidente të rënda ndaj përfaqësuesve të medias. Gjatë kohës që gazetarët po intervistonin qytetarët pjesëmarrës, organizatori i protestës, Arjan Asimi, aktivist i subjektit politik "Shqipëria bëhet", ka ndërhyrë duke akuzuar mediat si “të shitura” dhe në shërbim të pushtetit.
Sipas dëshmive, situata ka përshkallëzuar në ofendime dhe përplasje fizike, duke detyruar grupet e xhirimit të ndërpresin raportimin dhe të largohen nga vendngjarja. Gazetarët e pranishëm, mes të cilëve edhe korrespondenti i Report Tv, Armand Braho, iu drejtuan menjëherë Komisariatit të Policisë së Maliqit për të kryer denoncim për pengim të detyrës, goditje fizike dhe denigrim të figurës. Arjan Asimi është shoqëruar nga forcat e rendit për t'u marrë në pyetje në lidhje me ngjarjen.
Organizatat e medias kanë reaguar menjëherë pas incidentit. Asociacioni i Gazetarëve të Shqipërisë (AGSH) theksoi se pakënaqësia ndaj medias nuk mund të justifikojë asnjë formë dhune ose intimidimi, duke kërkuar nga Policia e Shtetit dokumentimin e plotë të ngjarjes. Në të njëjtën linjë, Unioni i Gazetarëve Shqiptarë (UGSH) dënoi agresionin dhe mbështeti vendimin e gazetarëve për të ndërprerë punën në shenjë proteste ndaj kërcënimeve të ushtruara në terren.
Përditësime
Policia e Shtetit ka zyrtarizuar procedimin penal ndaj Arjan Asimit, aktivist i partisë 'Shqipëria Bëhet', për veprat penale 'Kanosja për shkak të detyrës' dhe 'Fyerja'. Autoritetet kanë identifikuar 6 gazetarët e prekur nga incidenti: Xh. Sh., A. B., I. R., S. Xh., Dh. Ç. dhe E. Xh. Materialet procedurale i janë referuar Prokurorisë së Korçës për veprime të mëtejshme ligjore.
Policia identifikoi autorin e incidentit si Arjan Asimi, 45 vjeç, banues në fshatin Libonik. Autori ndodhet aktualisht në ambientet e komisariatit për procedurat e mëtejshme hetimore.
Hetimet e mëtejshme të Policisë së Shtetit zbardhën detaje të reja mbi rolin e Arjan Asimit dhe pjesëmarrësve të tjerë në incidentin ndaj gazetarëve në Maliq. Autoritetet konfirmuan se Asimi nuk ishte thjesht një protestues, por një ndër organizatorët e tubimit. Gjithashtu, hetimet identifikuan se përplasjet fizike ndaj punonjësve të medias u kryen nga një grup mbështetësish të tjerë të protestës, duke tejkaluar veprimet individuale të mëparshme.