Një ngjarje e rëndë është regjistruar në qytetin e Fierit, ku tri vajza adoleshente kanë ushtruar dhunë fizike ndaj një bashkëmoshatareje të tyre brenda një banese. Ngjarja është dokumentuar përmes një videoje të regjistruar nga vetë autorët e aktit.
Në pamjet e publikuara, viktima shfaqet duke u goditur me shuplaka dhe grushte. Sipas raportimeve, ajo është tërhequr zvarrë për flokësh, ndërsa më pas është goditur me shqelma nga dy prej vajzave. Gjatë regjistrimit, dëgjohet edhe vajza që po filmon, e cila nxit bashkëmoshataret e saj që të vazhdojnë veprimet e dhunshme.
Sipas njoftimit nga Policia e Fierit, rasti është denoncuar zyrtarisht. Organet kompetente kanë nisur procedurat hetimore për të bërë të mundur identifikimin e saktë të të miturave të përfshira dhe zbardhjen e shkaqeve të këtij konflikti. Identiteti i vajzave nuk është bërë publik për shkak të moshës së tyre, ndërsa motivet mbeten ende të paqarta.