Ngjarja ka ndodhur në ambientet e Spitalit Rajonal të Lezhës, ku shtetasi me inicialet G. N., 54 vjeç, kishte shkuar për të marrë mjekim për shkak të problemeve shëndetësore. Gjatë qëndrimit në spital, nga çanta e krahut të tij ka rënë një armë zjarri, e dyshuar si pistoletë, e cila është shkrepur në mënyrë të pavullnetshme.
Pas incidentit, policia ka proceduar penalisht në gjendje të lirë G. N.. Në vijim të hetimeve, forcat e rendit kanë shpallur në kërkim djalin e tij, 18 vjeç, pasi dyshohet se ka fshehur armën me qëllim shmangien e zbulimit të së vërtetës për këtë ngjarje.
Ndërkohë, nën hetim në gjendje të lirë është vënë edhe një punonjës IT në Spitalin e Lezhës, shtetasi A. V., 54 vjeç. Sipas njoftimit zyrtar të policisë, ky i fundit dyshohet se ka kryer veprime të cilat kanë penguar zbardhjen e plotë të rrethanave të rastit.
Autoritetet policore bëjnë me dije se hetimet po vijojnë për dokumentimin e plotë ligjor të veprimeve të secilit prej personave të përfshirë në këtë incident.