Presidenti i FIFA-s, Gianni Infantino, ka zhvilluar një vizitë në dhomën e zhveshjes së kombëtares së Iranit pas përfundimit të ndeshjes së grupit G ndaj Zelandës së Re. Takimi erdhi si pasojë e vështirësive të hasura nga delegacioni iranian me marrjen e vizave për hyrje në SHBA.
Sulmuesi Mehdi Taremi konfirmoi se lojtarët shfrytëzuan rastin për t'i kërkuar kreut të institucionit botëror të futbollit sqarime lidhur me refuzimin e vizave për disa zyrtarë të ekipit. Në një regjistrim të bërë publik nga takimi, Infantino u shprehu mbështetjen lojtarëve, duke u siguruar se do të bëjë çdo përpjekje në kompetencat e tij që zyrtarët e mbetur të mund të udhëtojnë drejt SHBA-së për ndeshjet e ardhshme.
"E di çfarë po kaloni dhe e kuptoj situatën. Por ju jeni më të fortë se çdo pengesë. Keni bashkuar botën dhe ju falënderoj për këtë", deklaroi Infantino para lojtarëve iranianë. Nga ana e tij, Taremi u shpreh se ekipi e mirëpret këtë mbështetje dhe beson në premtimet e dhëna nga kreu i FIFA-s.
Kjo situatë zhvillohet në sfondin e tensioneve të shtuara politike ndërmjet SHBA-së dhe Iranit. Pjesëmarrja e Iranit në këtë kampionat botëror kishte qenë në dyshim deri në momentet e fundit për shkak të shqetësimeve për sigurinë e delegacionit. Për më tepër, vëmendje të shtuar tërhoqi deklarata e presidentit të SHBA-së, Donald Trump, i cili deklaroi se është arritur një marrëveshje për t'i dhënë fund luftës me Iranin, ceremoni e cila pritet të mbahet të premten në Zvicër.