Më 17 korrik 2026, Inspektorati i Përgjithshëm lançoi platformën kombëtare sigurt.gov.al, një mjet digjital që synon rritjen e transparencës dhe bashkëpunimin ndërinstitucional. Platforma ofron mundësi për qytetarët që të denoncojnë sipërmarrje për shkelje të legjislacionit në fuqi, si shkeljet e ligjit të punës apo ndotja e mjedisit.
Sistemi është dizajnuar për të garantuar privatësinë, pasi raportuesit, qofshin qytetarë apo biznese, mund të zgjedhin midis identifikimit ose ruajtjes së anonimatit. Përveç raportimit të sipërmarrjeve, bizneset mund të përdorin këtë hapësirë për të denoncuar inspektorët që nuk zbatojnë ligjin, rregulloret ose shkelin etikën profesionale.
Mbështetje për bizneset
Platforma shërben edhe si burim këshillimi për sektorin privat, duke ofruar:
• Checklist-a sektoriale për vlerësim të brendshëm.
• Materiale vetëkontrolli dhe udhëzime praktike.
• Rekomandime për reduktimin e riskut ligjor dhe përmirësimin e përputhshmërisë me standardet në inspektim.
Për të siguruar llogaridhënie, çdo raportim pajiset me një kod unik gjurmimi, që lejon palët të ndjekin në kohë reale fazat e trajtimit të rastit. Gjithashtu, institucioni do të publikojë statistika dhe të dhëna të agreguara e të anonimizuara mbi trendet e problematikave, pa ekspozuar identitetet e raportuesve.