Të dhënat e INSTAT tregojnë se në vitin 2024 në Shqipëri lindën 12.094 djem dhe 11.216 vajza. Kjo krijon një raport prej 108 djem për çdo 100 vajza, ndërsa norma natyrale biologjike është 105.
Devijimi është më i theksuar te lindjet e katërta dhe më tej, ku raporti arrin 113 djem për 100 vajza. Edhe te lindja e parë dhe e tretë raporti mbetet mbi nivelin biologjik.
Numri total i lindjeve ra në 23.310 në vitin 2024, me 307 lindje më pak se një vit më parë. Indeksi sintetik i fekonditetit qëndron në 1.64 fëmijë për grua, shumë poshtë nivelit 2.1 që nevojitet për zëvendësimin natyral të popullsisë.
Popullsia e Shqipërisë zbriti në 2.36 milionë banorë në fund të vitit 2024. Grupi i moshës mbi 65 vjeç vazhdon të rritet dhe emigracioni neto mbetet negativ.
Sociologia Marsida Simo thekson se ky fenomen mund të lidhet me preferencën për djemtë dhe ndikon te krijimi i familjeve, lindshmëria dhe stabiliteti social, sidomos në kushtet e rënies së lindjeve dhe emigracionit.