Ndërmjet viteve 2015 dhe 2025, numri i fëmijëve të lindur në Shqipëri u ul me 35%, sipas të dhënave zyrtare të INSTAT. Kjo rënie reflekton tkurrjen e bazës riprodhuese të popullsisë, veçanërisht në grupmoshat 20-39 vjeç.
Të dhënat tregojnë se numri i grave në kulmin e riprodhimit, mosha 20-34 vjeç, ra me 32% gjatë kësaj periudhe. Qarqe të tëra kanë humbur mbi gjysmën e grave në moshën e lindjes. Popullsia në moshë riprodhimi u tkurr dy herë më shpejt se popullsia e përgjithshme, duke krijuar një cikël negativ demografik.
Në vitin 2025, lindën 21.425 bebe në të gjithë vendin, 8% më pak se në vitin 2024. Pas pandemisë, ritmi i rënies u thellua me rreth 26% gjatë periudhës 2021-2025.
Profesor Ilir Gëdeshi, ekspert i zhvillimeve demografike, thekson se kjo nuk vjen vetëm nga emigracioni i lartë i të rinjve apo prioriteti i karrierës, por edhe nga kostot e larta për një familje të re. “Vrojtimet tona kanë gjetur se çiftet e reja në Tiranë lindin më pak se bashkëmoshatarët shqiptarë në emigracion, ku shpesh lindin dy ose më shumë fëmijë”, tha ai.
Demografët vërejnë një hendek mes dëshirës ideale për fëmijë dhe realitetit. Në anketën e shëndetit të vitit 2018, gratë deklaruan numrin ideal të fëmijëve, por lindjet e vërteta mbeten më të ulëta.