Një ngjarje tragjike ka ndodhur në Argjentinë, ku një instruktor fluturimi është hedhur nga një avion në lëvizje, duke humbur jetën. Ngjarja është konfirmuar nga prokuroria publike, e cila bëri të ditur se viktima është Leandro Andrés Bertazzo, 42 vjeç.
Sipas dëshmisë së studentes 22-vjeçare të identifikuar si Rosario, e cila po trajnohej në bordin e avionit Cessna 150, instruktori i kishte thënë asaj: “E di çfarë duhet të bësh, tani vazhdo vetë”. Më pas, ai ka hequr kufjet dhe rripin e sigurimit, ka hapur derën e avionit dhe është hedhur në ajër.
Eduardo Álvarez, drejtori i shkollës së fluturimit “Flying Parrot Córdoba”, ku punonte Bertazzo, deklaroi se nuk kishte pasur asnjë shenjë paralajmëruese që piloti po planifikonte një veprim të tillë. Ai shtoi se instruktori kishte kryer një fluturim tjetër me një student gjatë së njëjtës ditë pa asnjë problem.
Megjithëse ndodhej në gjendje shoku, studentja arriti ta ulte avionin në mënyrë të sigurt, pa shkaktuar dëme në mjet. Autoritetet gjyqësore në Argjentinë kanë nisur hetimet për të përcaktuar detajet e plota të kësaj ngjarjeje.