Klubi i Interit ka arritur marrëveshje me Union Saint-Gilloise për afrimin e futbollistit Anan Khalaili. Pas dy ofertave të refuzuara më parë, përkatësisht prej 20 milionë eurosh dhe 23 milionë eurosh, drejtuesit e klubit italian kanë siguruar shërbimet e lojtarit me një ofertë finale prej 25 milionë eurosh fikse, plus bonuse që mund ta çojnë vlerën e operacionit deri në 30 milionë euro, shuma që kërkonte klubi belg.
Sipas raportimeve, transferimi u finalizua pas një takimi të drejtpërdrejtë ndërmjet përfaqësuesve të të dy klubeve. Në marrëveshje është përfshirë edhe një klauzolë që i garanton ish-klubit të lojtarit, Maccabi Haifa, 15 për qind nga vlera e një shitjeje të ardhshme. Anan Khalaili, i cili në shtator mbush 22 vjeç, do të nënshkruajë një kontratë 4-vjeçare me një pagë vjetore prej 2.2 milionë eurosh.
Lojtari do të udhëtojë drejt Milanos gjatë fundjavës për t’iu nënshtruar kontrolleve mjekësore përpara se t'i bashkohet ekipit në përgatitjet për sezonin e ri. Interi e përqendroi vëmendjen te reprezentuesi izraelit pasi humbi garën për Marco Palestra-n, i cili u transferua te Chelsea. Khalaili vjen si pasuesi i Denzel Dumfries, mbrojtësit që u largua së fundmi drejt Real Madridit. Më herët gjatë këtij afati kalimtar, edhe Napoli shfaqi interes për lojtarin, por negociatat nuk përparuan.