E ardhmja e mesfushorit Kristjan Asllani duket gjithnjë e më larg skuadrës së Interit, me klubin nga Emiratet e Bashkuara Arabe, Al Jazira, që ka shfaqur interesim konkret për shërbimet e tij. Negociatat midis klubeve kanë nisur, ndërsa të dyja palët po kërkojnë një zgjidhje në ditët e fundit të merkatos së verës.
Pozicioni i Interit mbetet i palëkundur, pasi drejtuesit e klubit zikaltër kërkojnë shitjen e përhershme të kartonit të 24-vjeçarit, duke e vlerësuar atë në shifrën prej 10-15 milionë euro. Nga ana tjetër, lojtari ndodhet përpara një vendimi të rëndësishëm, pasi synimi i tij është të vazhdojë karrierën në një kampionat europian, konkretisht në Serie A.
Kristjan Asllani, i cili nuk bën pjesë në planet e trajnerit Cristian Chivu, vjen pas një sezoni ku ishte i huazuar te Torino dhe Besiktas. Përveç interesit nga Al Jazira, më herët në media u përfol edhe një mundësi kalimi te Monza, pistë e cila është ftohur. Zhvillimet e fundit priten gjatë orëve në vijim, ndërsa lojtari vazhdon të shqyrtojë projektin e paraqitur nga klubi i Abu Dhabit.
Përditësime
Gazetari Fabrizio Romano konfirmoi se Interi dhe Al Jazira kanë nisur zyrtarisht negociatat për transferimin e mesfushorit Kristjan Asllani. Drejtuesit zikaltër refuzuan kategorikisht mundësinë e huazimit, duke kërkuar vetëm shitjen e përhershme të kartonit. Lojtari vjen pas një edicioni te Besiktas, ku regjistroi 33 ndeshje, 2 gola dhe 2 asistime. Burime pranë klubit sqaruan se aktualisht nuk ka asnjë interesim konkret nga klubet e Serie A.
Kristjan Asllani ka ndryshuar qëndrim duke pranuar parimisht transferimin te Al Jazira. Mesfushori shfaqi dakordësinë e tij pas një kontakti të drejtpërdrejtë me drejtuesit e klubit nga Abu Dhabi. Ky zhvillim forcon ndjeshëm pozitat e Al Jazira-s në garën për sigurimin e shërbimeve të 24-vjeçarit, duke tejkaluar hezitimet e mëparshme të lojtarit për t'u larguar nga futbolli europian.
Interi dhe Al Jazira kanë arritur një akord verbal për transferimin e Kristjan Asllanit. Marrëveshja parashikon një huazim me vlerë 2 milionë euro, shoqëruar me një opsion blerjeje prej 6.5 milionë eurosh. Ky opsion do të shndërrohet në detyrim blerjeje nëse plotësohen kushte specifike të paracaktuara nga palët.
Gazetari Fabrizio Romano konfirmoi se marrëveshja mes Interit dhe Al Jazira për transferimin e Kristjan Asllanit është në fazën përfundimtare. Palët janë aktualisht në negociata për të përcaktuar kushtet personale të kontratës së lojtarit, ndërsa akordi ndërmjet dy klubeve është arritur.