E ardhmja e Kristjan Asllanit në radhët e Interit duket drejt fundit, pasi mesfushori 24-vjeçar nuk bën pjesë në planet e trajnerit Cristian Chivu për sezonin 2026/2027. Interesi i Monzës për lojtarin ka ardhur si pasojë e nevojës për përforcime në mesfushë, pas dëmtimit të rëndë të kapitenit Matteo Pessina. Trajneri i Monzës, Ivan Jurić, ka konfirmuar se dëmtimi në gju i Pessinës do ta mbajë atë jashtë fushave për një periudhë të gjatë.
Lidhur me aspektin financiar, palët janë ende në negociata për të gjetur një gjuhë të përbashkët. Interi vlerëson kartonin e mesfushorit midis 12 dhe 15 milionë eurove, ndërsa oferta e raportuar nga Monza kap vlerën e 8 milionë eurove. Për të zhbllokuar situatën, po shqyrtohen edhe mundësi të tjera operacionale, si huazimi me detyrim ose opsion blerjeje, veçanërisht nëse Monza siguron mbijetesën në Serie A.
Sipas raportimeve, emri i Asllanit është lakuar si alternativë për shkak të dëshirës së futbollistit për të vijuar karrierën në elitën e futbollit italian. Më herët, për mesfushorin nga Elbasani pati interesim edhe nga Liga Saudite, konkretisht nga Al Ittihad, por bisedimet për një shkëmbim të mundshëm me lojtarin Diaby nuk u finalizuan. Gjithashtu, theksohet se gjatë periudhës së fundit, Asllani ishte i aktivizuar në formë huazimi te Besiktasi, ku regjistroi 14 paraqitje dhe shënoi 2 gola.