E ardhmja e mesfushorit shqiptar Kristjan Asllani mbetet në udhëkryq, pasi lojtari nuk bën më pjesë në projektet e Interit. 24-vjeçari nuk është përfshirë në fazën përgatitore të skuadrës zikaltre, duke nxitur spekulime të shumta për një largim të mundshëm gjatë kësaj vere. Klubi italian po përpiqet të përdorë kartonin e Asllanit si pjesë të një formule shkëmbimi për të siguruar shërbimet e sulmuesit francez Moussa Diaby.
Ndonëse mediat raportuan për një interesim të klubit saudit Al Itihad, marrëveshja duket se është e pamundur. Al Itihad ka zyrtarizuar blerjen e mesfushorit senegalez Dion Lopi nga Almeria për shumën e 19 milionë eurove. Meqenëse Lopi luan në të njëjtin pozicion me Asllanin dhe për shkak të kufizimeve të rrepta për numrin e lojtarëve të huaj në kampionatin saudit, klubi i Al Itihad nuk pritet të ndërmarrë hapa të mëtejshëm për mesfushorin kuqezi.
Aktualisht, negociatat e Interit me klubet e tjera nuk kanë sjellë ende një marrëveshje përfundimtare. Pengesat kryesore në këtë proces mbeten paga e lartë e futbollistit dhe pretendimi i klubit italian për të arkëtuar rreth 10 milionë euro nga shitja e kartonit të tij. Në të kaluarën, emri i Asllanit është lakuar edhe për interesime nga skuadra të tjera të Serie A, si Atalanta, Sassuolo dhe Cagliari.
Ndërsa lojtari kishte shfaqur gatishmëri për t'iu bashkuar skuadrës saudite, zhvillimet e fundit në tregun e transferimeve e kanë kthyer vëmendjen e tij sërish drejt opsioneve të tjera në Europë, pavarësisht faktit se për momentin ai mbetet në pritje të një sistemimi të përshtatshëm.