Goditja e tregut të pasurive të paluajtshme në Dubai, për shkak të sulmeve në Lindjen e Mesme, po shndërrohet në mundësi për zonat bregdetare shqiptare, veçanërisht Sarandën e Vlorën.
Sipas agjentit imobiliar Eron Çumani, investitorët ndërkombëtarë që më parë zgjidhnin Dubai tani e shohin Shqipërinë si alternativë më të sigurt dhe me potencial rritjeje. «Të gjitha kapitalet që vendosen, qoftë në mënyrë formale apo informale, shpesh investohen në pasuri të paluajtshme. Në Dubai, pas fillimit të luftës në Lindjen e Mesme, 30 deri në 70% e pronave kanë humbur vlerë», thotë ai.
Çumani thekson se Shqipëria nuk është e ekspozuar ndaj konflikteve apo luftërave, çka e bën Rivierën shqiptare destinacion tërheqës. Tashmë po shfaqet faza fillestare e interesimit, ku disa shoqëri që blinin prona në Dubai po shqyrtojnë vila e apartamente në Shqipëri për kthim kapitali përmes qiradhënies ose rritjes së vlerës.
Ky trend pritet të rrisë kërkesën dhe të ndikojë gradualisht në çmimet e zonave premium bregdetare.
Konteksti i Dubait
Dubai u bë tërheqës për pasuritë e paluajtshme si strehë e sigurt për kapitalin ndërkombëtar, falë taksave të ulëta, lehtësisë për të bërë biznes dhe kthimeve të larta nga qiratë e rritja e vlerës. Sipas Reuters, imazhi i tij si vend i qëndrueshëm në rajon me tensione u mbështet nga infrastruktura moderne dhe klima miqësore ndaj investitorëve të huaj. Në vitet e fundit, shitjet e larta të pronave në ndërtim dhe hyrja e blerësve të huaj për fitim e diversifikim gjeografik ushqyen këtë interes.