Iraku përfshihet në luftën e Iranit teksa Teherani zgjeron fushëbetejën

Teherani ka zgjeruar fushëbetejën në mbarë Lindjen e Mesme, duke përfshirë Irakun, pas nisjes së fushatës bombarduese nga Shtetet e Bashkuara dhe Izraeli kundër Iranit.

Në Irak, forcat aleate të Teheranit kryejnë pothuajse në baza ditore sulme ndaj caqeve amerikane, përfshirë ndërtesat diplomatike dhe ushtarake. Këto sulme kanë nxitur përgjigje ajrore hakmarrëse nga SHBA.

Vetë Irani ka lansuar valë sulmesh me raketa dhe dronë në rajonin gjysmë-autonom kurd në veri të Irakut, ku grupet opozitare iraniane kurde operojnë kampe dhe kanë zyra.

Intensifikimi i dhunës kërcënon destabilizimin e Irakut, shtet me shumicë shiite me afër 46 milionë banorë, i cili ende po rimëkëmbet nga pasiguritë pas pushtimit amerikan të 2003-s dhe konfliktit të gjatë që pasoi.

Vlerësimi i ekspertëve

Colin Clarke, drejtor ekzekutiv i Qendrës Soufan me seli në Nju Jork, deklaroi se gjasat për përfshirjen më të thellë të Irakut në luftën e Iranit janë jashtëzakonisht të larta. Ai shpjegoi se kjo vjen pjesërisht për shkak të ndikimit të Teheranit, veçanërisht në dy dekadat e fundit, kur regjimi është lidhur ngushtë me milicitë irakiane.

Dallimi me konfliktin e mëparshëm

Gjatë bombardimeve të Izraelit dhe SHBA-së në Iran në qershor të 2025-s, bashkëpunëtorët e Teheranit në Irak nuk u angazhuan gjerësisht. Megjithatë, kësaj here Rezistenca Islamike në Irak, organizatë ombrellë e grupeve të armatosura shiite të mbështetura nga Irani, u përfshi menjëherë në konflikt.

Ekspertët thonë se Irani e percepton konfliktin aktual si luftë ekzistenciale, ndryshe nga lufta 12-ditore e qershorit të vitit të kaluar. Teherani po shfrytëzon maksimalisht aftësitë ushtarake të veta dhe aftësitë asimetrike të aleatëve në Lindjen e Mesme për t’u kundërvënë SHBA-së dhe Izraelit.

Farzin Nadimi, specialist për mbrojtjen e Iranit, nënvizoi se sponsori kryesor i këtyre grupeve në Irak ndodhet në një luftë ekzistenciale dhe për të është «o sot, o kurrë».