Irani dhe Shtetet e Bashkuara të Amerikës kanë marrë një draft-propozim që parashikon një armëpushim 45-ditor dhe rihapjen e Ngushticës së Hormuzit, si një mundësi për t’i dhënë fund luftës. Dy zyrtarë të Lindjes së Mesme e kanë bërë të ditur këtë për Associated Press, në kushte anonimiteti për shkak të ndjeshmërisë së negociatave.
Propozimi vjen nga ndërmjetësues nga Egjipti, Pakistani dhe Turqia, të cilët po punojnë për të ndaluar përshkallëzimin e konfliktit. Periudha 45-ditore synon të krijojë hapësirë për bisedime të thelluara drejt një armëpushimi të përhershëm. Ai u dërgua të dielën në mbrëmje ministrit të Jashtëm të Iranit, Abbas Araghchi, dhe të dërguarit të SHBA-së për Lindjen e Mesme, Steve Witkoff.
Deri tani asnjëra palë nuk ka dhënë reagim zyrtar. Irani ka insistuar se do të vazhdojë luftën derisa të marrë kompensime financiare dhe garanci se nuk do të sulmohet sërish. Ndërkohë, presidenti i SHBA-së, Donald Trump, ka paralajmëruar goditje ndaj urave dhe centraleve energjetike iraniane gjatë kësaj jave.
Mbetet e paqartë nëse palët do të pranojnë kushtet e propozimit. Faqja e lajmeve Axios ishte e para që raportoi mbi përmbajtjen e tij.