Autoritetet në Iran kanë ekzekutuar në orët e para të së shtunës Marzieh Nieri, 23 vjeçe, në burgun qendror të Qazvinit. Nieri ishte dënuar me vdekje pasi gjykata nuk pranoi pretendimin e saj se ajo kishte vepruar në vetëmbrojtje gjatë një tentative për sulm seksual në tetor të vitit 2021, kur ajo ishte 18 vjeçe. Sipas dëshmisë së saj, një partner biznesi i bashkëshortit kishte tentuar ta sulmonte, ndërsa gjatë përleshjes, ku mbeti i vrarë edhe bashkëshorti, ajo përdori një thikë kuzhine. Pas ngjarjes, ajo u dorëzua vetë në polici. Dënimi u zbatua në përputhje me parimin e "qisas", pas kërkesës së familjeve të viktimave.
Sipas organizatës Iran Human Rights, ekzekutimi i Nierit e çon në të paktën 14 numrin e grave të ekzekutuara në vend që nga fillimi i vitit 2026. Organizatat për të drejtat e njeriut theksojnë se shumë gra të dënuara me vdekje, shpesh nën akuzën e vrasjes së bashkëshortit, kanë përjetuar dhunë familjare dhe janë përballur me kufizime për t'u larguar nga marrëdhëniet abuzive. Në vitin 2025, të paktën 61 gra u ekzekutuan në Iran, shifra më e lartë në 25 vitet e fundit, ndërsa numri i përgjithshëm i ekzekutimeve për atë vit shkoi në 1,639.
Në një rast tjetër, autoritetet në provincën Mazandaran njoftuan dënimin e Kolthoum Akbari me 10 dënime me vdekje, pasi ajo pranoi vrasjen e 10 personave me të cilët ishte martuar në martesa të përkohshme. Hetimet kishin nisur në shtator të vitit 2023 pas vdekjes së dyshimtë të një 82-vjeçari. Kombet e Bashkuara, përmes Komisionerit të Lartë për të Drejtat e Njeriut, Volker Türk, kanë bërë thirrje për ndalimin e ekzekutimeve, duke raportuar se prej 19 marsit 2026 janë ekzekutuar të paktën 56 persona për akuza të lidhura me sigurinë kombëtare.