Ndërmjetësit në Pakistan presin një propozim të rishikuar nga Irani në ditët në vijim për t’i dhënë fund luftës, sipas burimeve të përfshira në procesin e ndërmjetësimit për CNN. Kjo vjen pasi Presidenti i SHBA-së Donald Trump refuzoi versionin e mëparshëm të propozuar gjatë fundjavës.
Propozimi fillestar iranian parashikonte ndërprerjen e armiqësive si hap të parë dhe trajtimin e çështjeve më komplekse të programit bërthamor në një fazë të dytë. Trump ka sinjalizuar se nuk e pranon këtë qasje dhe shumë do të varet nga versioni i ri, nëse është më i pranueshëm për SHBA-në.
Ministri i Jashtëm iranian Abbas Araghchi u kthye sot në Teheran pas një vizite në Rusi, ku pritet të zhvillojë konsultime me udhëheqësit e vendit. Procesi i vendimmarrjes ecën me ritëm të ngadaltë për shkak të vështirësive në komunikimin me Udhëheqësin Suprem Mojtaba Khamenei, vendndodhja e të cilit mbahet sekret.
Në një postim në rrjetet sociale të martën, Trump shkroi se Irani i ka informuar SHBA-të se ndodhet në një "gjendje kolapsi". Ai shtoi se Teherani dëshiron hapjen e Ngushticës së Hormuzit ndërsa përpiqet të zgjidhë çështjet e lidershipit të vet. Burimet e përshkruajnë procesin si të vazhdueshëm dhe të paqëndrueshëm.