Kreu i Komitetit të Sigurisë Kombëtare të Iranit, Ebrahim Aziz, bëri të ditur se një projektligj i propozuar do t’i japë ushtrisë iranianë përgjegjësinë zyrtare për menaxhimin e Ngushticës së Hormuzit. Forcat e armatosura tashmë kontrollojnë këtë kalim strategjik dhe synojnë të ndalojnë anijet armiqësore, ndërsa kuadri ligjor i ri do të mundësojë vendosjen e tarifave në rialë iranianë për anijet që kalojnë.
Ngushtica e Hormuzit mbetet pothuajse e mbyllur për transportin ndërkombëtar detar për shkak të bllokadave nga Irani dhe Shtetet e Bashkuara. Trafiku është shumë i kufizuar, kryesisht në koordinim me Teheranin, me incidente si hapja e zjarrit nga anije të shpejta iraniane dhe sekuestrimet nga forcat amerikane. Sipas Bloomberg, vetëm disa anije me lidhje me Iranin kanë dalë nga Gjiri Persik, pa trafik hyrës.
Në këtë kontekst, Irani ofroi rihapjen e ngushticës nëse SHBA heqin bllokadën dhe lufta përfundon, duke lënë për më vonë diskutimet mbi programin bërthamor, raketat dhe sanksionet. Propozimi u diskutua në takime joformale me zyrtarë pakistanezë dhe u bë publik gjatë vizitës së Ministrit të Jashtëm iranian, Abbas Araghchi, në Rusi, ku ai u takua me Vladimir Putin për mbështetje ekonomike dhe strategjike.
Presidenti i SHBA-së, Donald Trump, anuloi bisedimet indirekte në Islamabad dhe sugjeroi negociata telefonike, duke thënë se SHBA kanë të gjitha kartat në dorë. Sekretari i Shtetit, Marco Rubio, theksoi se çdo marrëveshje duhet të ndalojë zhvillimin e armëve bërthamore nga Irani dhe udhëheqësit iranianë nuk mund të shpëtojnë pa ndëshkim. Kancelari gjerman, Friedrich Merz, deklaroi se SHBA po poshtërohen nga lidershipi iranian, i cili zvarrit negociatat.
Lufta në Lindjen e Mesme, në javën e nëntë, ka rritur çmimet e naftës mbi 100 dollarë për fuçi. Bllokada amerikane, e nisur në mes të prillit, synon të kufizojë eksportet e naftës iraniane, duke tkurrur ekonominë e Iranit me mbi 6% sipas Fondit Ndërkombëtar Monetar dhe duke rritur inflacionin. International Maritime Organization kundërshton tarifat, duke thënë se nuk kanë bazë ligjore në rrugët ndërkombëtare detare.