Sulmet e deritanishme të Iranit ndaj Emirateve të Bashkuara Arabe kanë lënë 68 persona të plagosur dhe 3 të vdekur.
Esmeralda Shkjau, ish-deputete socialiste që jeton në Dubai prej tetë vitesh dhe angazhohet në projekte teknologjie, foli në një intervistë me gazetarin Muhamed Veliu të Top Channel për situatën e 48 orëve të fundit.
Ajo shpjegoi se fëmijët zhvillojnë mësimin në distancë dhe nuk shkojnë në shkollë, ndërsa qendrat tregtare, restorantet dhe shërbimet e shpërndarjes funksionojnë normalisht. Goditjet kanë qenë të përqendruara kryesisht në Emiratet e Bashkuara. Nga ana emocionale, banorët janë ndikuar, pasi nuk është e lehtë t’i shpjegosh fëmijës çfarë po ndodh.
Banorët kanë dëgjuar zhurma të mëdha shqetësuese nga sulmet, por ato kanë mbetur vetëm si tinguj, pa dëme në zonat rezidenciale. Ata kanë parë fragmente të interceptimit të raketave si re të vogla në qiell.
Qeveria lokale ka komunikuar përditësime, duke theksuar neutralizimin e 148 dronëve, 9 raketave balistike dhe 6 raketave cruise të lëshuara nga Irani. Ministrja Rimel Hashimi ka përsëritur thirrjen për ulje tensioni si hapin e parë të preferuar nga autoritetet e Emirateve të Bashkuara.
Fluturimet nga aeroporti i Dubait kanë rinisur me 80 fluturime, ku mbi 27.000 udhëtarë janë gati për t’u imbarkuar. Shkjau shprehu shpresën se muaji i Ramazanit do të sjellë paqe dhe pjekuri, duke paralajmëruar kundër panikut që çon në lëvizje të gabuara.