Ish-ministrja e Bujqësisë Frida Krifca dha dëshmi për disa orë të martën e 17 marsit në Prokurorinë e Posaçme Kundër Korrupsionit dhe Krimit të Organizuar (SPAK). Ajo u pyet si person në dijeni për dosjen e abuzimeve me fondet e programit IPARD, e cila hetohet nga prokurori Klodian Braho. Paraqitja e saj ndodhi në orët e pasdites, duke i shpëtuar vëmendjes së medias.
Më herët, Reni Ashiku, bashkëpunëtor i afërt i ish-ministres Krifca, u paraqit në SPAK për t'u marrë në pyetje. Burime pranë organit hetues bëjnë të ditur se dosja trajtohet me prioritet. Paralelisht me marrjen e dëshmive, po mblidhen prova të tjera rreth skemës së dyshuar abuzive.
Procedimi penal nisi pas kallëzimit të Zyrës Evropiane Kundër Mashtrimit (OLAF), e cila evidentoi shkelje në administrimin e fondeve të Bashkimit Evropian për sektorin bujqësor në Shqipëri. Si pasojë e rekomandimeve të OLAF-it, Bashkimi Evropian ndërpreu financimin përmes programit IPARD 3 dhe bllokoi qindra milionë euro të planifikuara si mbështetje për fermerët shqiptarë.
Dyshimet për abuzime përqendrohen te Agjencia për Zhvillim Bujqësor dhe Rural (AZHBR), ku ish-ministrja Frida Krifca është vënë në qendër të hetimeve. OLAF ka nxitur SPAK për të vazhduar hetimet deri në fund, me bashkëpunim të intensifikuar dhe asistencë nga ekspertë të huaj.
Përditësime
Bashkimi Europian kërkoi kthimin e mbi 33.5 milionë euro nga programi IPARD II, të shpenzuara në mënyrë të parregullt midis 2020-2022.
- OLAF identifikoi 52 raste abuzimesh, numrin më të lartë në rajon, përfshirë Turqinë.
- Qeveria shqiptare angazhoi kompani të jashtme për auditim të thelluar të IPARD II.
- Komisioni Europian deklaroi se do të trajtojë me seriozitet të plotë kthimin e fondeve të parregullta.