Ministria e Bujqësisë dhe Zhvillimit Rural ka zhvilluar së fundmi një takim në Bruksel me Drejtoreshën e Përgjithshme të Drejtorisë së Bujqësisë në Komisionin Europian, Elisabet Werner. Gjatë takimit u diskutua për progresin e Shqipërisë në përthithjen e fondeve europiane për bujqësinë dhe zhvillimin rural, si dhe hapat për zbatimin e programit IPARD III.
Sipas burimeve nga ministria, Bashkimi Europian ka dhënë dritën jeshile për rifillimin e financimit pas një periudhe trevjeçare pezullimi. Programi parashikon 112 milionë euro nga BE-ja dhe 34 milionë euro nga buxheti i shtetit, në total 146 milionë euro. Këto fonde do të shërbejnë për ndërtimin e serave, fermave të agropërpunimit dhe ngritjen e agroturizmit. Vendimi pritet të zyrtarizohet brenda pak javësh, ndërsa zbatimi në shtator të këtij viti.
Ministria e Bujqësisë ka sqaruar se IPARD III nuk është hapur ende për aplikime. Programi ndodhet në fazën e rishikimit të procedurave, finalizimit të akreditimit dhe përmbylljes së marrëveshjes së financimit me Komisionin Europian. Ky proces përfshin verifikimin e sistemeve të menaxhimit, kontrollit dhe monitorimit financiar për të garantuar përdorim transparent të fondeve.
Institucionet shqiptare bashkëpunojnë me strukturat europiane për të përmbyllur sa më shpejt akreditimin, me synim hapjen e programit menjëherë pas kësaj. Ministria do të njoftojë publikun sapo programi të hapet zyrtarisht. IPARD III për periudhën 2021-2027 mbështet investimet në bujqësi dhe zhvillim rural, si hap drejt administrimit të fondeve të BE-së.
Në programin IPARD II, Shqipëria përfitoi mbi 94 milionë euro për investime në sektorin agro-ushqimor, përmirësimin e konkurrueshmërisë dhe respektimin e standardeve europiane të mjedisit.
Përditësime
Ministri Andis Salla sqaroi se IPARD II u bllokua për 3 vjet nga OLAF për dyshime abuzimesh, bazuar në denoncime qytetarësh për korrupsion, favorizime dhe ndërhyrje politike. Bllokimi u ndërpre në gusht 2023.
IPARD III përfshin 9 masa specifike, ndër të cilat:
- infrastrukturë rurale;
- ndërtim tregjesh;
- agro-përpunim;
- agro-turizëm;
- pylltari;
- asistencë teknike.
Ministria e Bujqësisë publikoi listën e plotë të 9 masave të programit IPARD III. Pesë prej tyre aplikohen për herë të parë, përfshirë:
- Investimet në ferma bujqësore;
- Masat agro-mjedisore;
- Qasja LEADER.