Ministria e Financave njoftoi se ka përmbyllur përgatitjen e paketës së akreditimit për Programin IPARD III dhe e ka dorëzuar në Bruksel. Ky hap shënon përparim drejt aksesimit të fondeve të Bashkimit Evropian për zhvillimin e bujqësisë dhe zonave rurale, me synim çeljen gjatë vitit 2026.
Nën drejtimin e Zyrtarit Kombëtar Autorizues (ZKA), me mbështetjen e Drejtorisë Mbështetëse të ZKA-së dhe Drejtorisë së Fondit Kombëtar, u përgatit dokumentacioni i plotë në përputhje me standardet evropiane. Paketa përfshin kërkesën për besimin e detyrave të zbatimit buxhetor, të shoqëruar me prova të detajuara mbi përmbushjen e kritereve të Komisionit Evropian.
Procesi hyn tani në fazën e vlerësimit nga DG AGRI, që përfshin analizën e dokumentacionit dhe verifikime të mundshme në terren. Kjo fazë parashikohet gjatë tremujorit të dytë të vitit 2026.
Detajet e Programit IPARD III
Programi ka nëntë masa dhe ofron 112 milionë euro nga Bashkimi Evropian si dhe 34 milionë euro nga buxheti i shtetit. Ai mbështet:
- Infrastrukturën rurale;
- Ndërtimin e tregjeve;
- Agro-përpunimin;
- Agro-turizmin;
- Pylltarinë;
- Asistencën teknike.
Konteksti
Ministria e Bujqësisë dhe Zhvillimit Rural dorëzoi më 2 prill dosjen për mbrojtjen e interesave financiare të BE-së. Në gusht 2023, Zyra Evropiane Kundër Mashtrimit (OLAF) konstatoi shkelje të rënda në programin IPARD II. Ministri i Financave Petrit Malaj deklaroi në nëntor se IPARD III do të rihapet në 2026 pas plotësimit të masave të kërkuara.