Ngjarja e rëndë ka ndodhur rreth orës 11:30 në lagjen Gültepe të rrethit Sarıçam në Adana. Faruk Kayhan, 52 vjeç, është përfshirë në një debat me djalin e tij, Ahmet Kaan Kayhan, 23 vjeç. Konflikti mendohet se ka nisur pasi i ati nuk ka pranuar t'i japë para të birit, i cili sipas raportimeve kishte probleme me varësinë nga droga.
Sipas informacioneve nga mediat vendase, gjatë përplasjes fizike, i riu dyshohet se e ka sulmuar të atin me thikë. Në këto rrethana, 52-vjeçari ka nxjerrë armën e tij dhe ka qëlluar disa herë ndaj djalit, duke e lënë atë të vdekur në vend. Pas incidentit, ish-polici ka njoftuar vetë autoritetet dhe ka qëndruar pranë trupit të viktimës deri në mbërritjen e tyre.
Momente pas ngjarjes janë filmuar nga kalimtarë të rastit. Ekipet e policisë dhe të urgjencës mjekësore kanë mbërritur në vendin e ngjarjes, ku kanë konfirmuar vdekjen e 23-vjeçarit. Trupi i viktimës është transportuar për ekspertizë në Institutin e Mjekësisë Ligjore në Adana. Autoritetet turke kanë nisur hetimet për të zbardhur plotësisht rrethanat e ngjarjes.