Një ngjarje tragjike është regjistruar në plazhet e Otrantos, në Itali, ku një shtetas 54-vjeçar nga zona e Leçes, i identifikuar si Gennaro Cagnazzo, ka humbur jetën pasi ndërhyri për të shpëtuar dy fëmijët e tij binjakë, të moshës 8-vjeçare.
Incidenti ndodhi të shtunën, rreth orës 11:30, në kushte të vështira atmosferike ku erërat e forta kishin krijuar rryma të rrezikshme detare. Fëmijët u larguan nga bregu nga rrymat, çka shkaktoi alarmin e pushuesve. Cagnazzo u hodh menjëherë në ujë dhe arriti t'i kthejë binjakët të sigurt në breg.
Menjëherë pas daljes në breg, gjendja shëndetësore e Cagnazzo-s u përkeqësua papritur dhe ai u rrëzua. Pushuesit dhe më pas ekipet e emergjencës kanë tentuar t'i japin ndihmën e parë, por përpjekjet për ta rikthyer në jetë rezultuan të pasuksesshme. Autoritetet vendore dyshojnë se shkak i vdekjes ka qenë një problem i papritur shëndetësor, i ardhur si pasojë e sforcimit të madh fizik gjatë operacionit të shpëtimit.