Ngjarja ka ndodhur rreth orës 06:00 të mëngjesit në qytetin turistik Porto Sant’Elpidio. Ndërtesa dykatëshe, e cila shërbente si banesë për dy familje, është shkatërruar plotësisht si pasojë e shpërthimit, ndërsa dëme materiale janë shënuar edhe në ndërtesat dhe dyqanet e zonave përreth.
Trupi i pajetë i një burri 55-vjeçar u nxor nga ekipet e zjarrfikësve nën rrënoja. Prindërit e moshuar të viktimës, gjithashtu të lënduar, janë dërguar për trajtim të specializuar mjekësor; gruaja është transportuar me helikopter në spitalin Torrette di Ancona, ndërsa burri në spitalin e Fermos. Gjithashtu, nga rrënojat janë nxjerrë të gjallë një fëmijë dhe një grua tjetër, ndërsa dy banorë të ndërtesave fqinje janë evakuuar përmes shkallëve të mjeteve zjarrfikëse.
Në vendngjarje po punojnë ekipe të specializuara të shpëtimit, të cilat po përdorin dronë, qen nuhatës dhe mjete të rënda për të lokalizuar një grua që rezulton e zhdukur. Autoritetet italiane kanë nisur një hetim për të zbardhur shkaqet e ngjarjes, ku dyshimi kryesor mbetet rrjedhja e gazit.
Përditësime
Hetuesit kanë identifikuar apartamentin në katin e dytë si pikën e origjinës së shpërthimit, ku janë shkaktuar edhe dëmet më të mëdha strukturore. Ekspertët po krahasojnë dinamikën e ngjarjes me shembjen e 'Torre dei Conti' në Romë, për të vlerësuar ndikimin e presionit të gazit në stabilitetin e ndërtesës.