Kombëtarja e Izraelit ka mbërritur në Tiranë në prag të ndeshjes miqësore të së mërkurës kundër Shqipërisë. Delegacioni izraelit ka mbërritur pa trajnerin kryesor, Ran Ben Shimon, i cili është detyruar të mungojë për arsye shëndetësore.
Sipas raportimeve nga kampi izraelit, 55-vjeçari nuk ka mundur të udhëtojë drejt kryeqytetit shqiptar pasi ka pësuar një dëmtim në kokë gjatë një ndeshjeje padeli të zhvilluar pak ditë më parë. Me rekomandim të mjekëve, ai është këshilluar të shmangë udhëtimet me avion deri në përmirësimin e gjendjes së tij shëndetësore, duke e detyruar të qëndrojë në Izrael.
Në mungesë të trajnerit kryesor, detyrën e drejtimit të ekipit për këtë miqësore e ka marrë zëvendëstrajneri Gal Kohen. Ai do të jetë përgjegjës për përgatitjet dhe udhëheqjen e përfaqësueses izraelite në ndeshjen ndaj Shqipërisë, e cila konsiderohet një test përgatitor për të dyja palët në kuadër të angazhimeve të ardhshme ndërkombëtare.