Marina izraelite ndaloi anijet e Flotiljes Globale Sumud që synonin të arrinin në Gaza me ndihma humanitare. Aktivistët u çuan në portin e Ashdodit, ku u paraqitën të prangosur dhe të gjunjëzuar me kokën poshtë.
Ministri izraelit Itamar Ben Gvir vizitoi vendin e ndalimit dhe publikoi video me komente ironike, duke i quajtur aktivistët “mbështetës të terrorizmit”. Në video dëgjohet himni kombëtar izraelit dhe thirrje të tjera.
Qeveria italiane reagoi menjëherë. Kryeministrja Giorgia Meloni dhe ministri i Jashtëm Antonio Tajani deklaruan se pamjet janë të papranueshme dhe shkelin dinjitetin njerëzor. Italia kërkoi lirimin e menjëhershëm të qytetarëve të saj dhe thirri ambasadorin izraelit për shpjegime formale.
Në mesin e të ndaluarve ndodhet edhe aktivisti shqiptar Baki Goxhaj. Ministria e Jashtme e Shqipërisë po ndjek rastin përmes kanaleve diplomatike.
Organizatorët e flotiljes e cilësuan ndërhyrjen si akt piraterie, ndërsa autoritetet izraelite deklaruan se të ndaluarve do t’u garantohet akses konsullor.
Përditësime
Eriselda Balliu, bashkëshortja e Baki Goxhajt, deklaroi se nuk ka pasur kontakt me të dhe nuk mori informacion nga Ministria e Jashtme ose Ambasada Shqiptare në Izrael. Reagime erdhën nga Franca, Holanda, Belgjika, Spanja, Kanadaja, Britania, Gjermania dhe Irlanda. Ministri spanjoll José Manuel Albares e quajti videon "monstruoze, çnjerëzore dhe të turpshme".