Ministri për Evropën dhe Punët e Jashtme, Ferit Hoxha, ka reaguar sot përmes një postimi në rrjetin social X lidhur me imazhet që tregojnë trajtimin e aktivistëve të ndaluar të flotiljes humanitare "Sumud".
Hoxha i ka cilësuar këto pamje tronditëse dhe të papranueshme. Ai ka theksuar se të gjithë personat e ndaluar duhet të trajtohen me dinjitet dhe në respekt të plotë të të drejtave të njeriut, të ligjit ndërkombëtar dhe të ligjit humanitar.
Ministri njoftoi se ka udhëzuar Ambasadën e Shqipërisë në Tel Aviv që të mbetet në kontakt të ngushtë me autoritetet izraelite. Qëllimi është që qytetarit shqiptar t'i ofrohet ndihma e duhur konsullore sipas nevojës dhe në përputhje me ligjin ndërkombëtar.
Flotilja "Sumud", që synonte të çonte ndihma humanitare në Gaza, u ndalua nga marina izraelite në ujërat pranë Qipros. Mes rreth 430 aktivistëve të ndaluar nga vende të ndryshme ndodhet edhe shtetasi shqiptar Baki Goxhaj.