Ministri për Evropën dhe Punët e Jashtme, Ferit Hoxha, bëri të ditur se shtetasi shqiptar Baki Goxhaj është tashmë rrugës për t'u kthyer në Shqipëri. Goxhaj u ndalua nga autoritetet izraelite ndërsa merrte pjesë në flotiljen humanitare "Global Sumud".
Në një postim në rrjetin social X, Hoxha theksoi se strukturat e Shërbimit të Jashtëm, në bashkërendim me institucionet e tjera shqiptare, kanë ndjekur pa ndërprerë çështjen që nga momenti i parë i sinjalizimit. Ai shtoi se Shqipëria ka qenë e qartë dhe konsistente në kërkesën për respektimin e plotë të të drejtave të shtetasit shqiptar, në përputhje me të drejtën ndërkombëtare dhe normat humanitare.
Ministri e përshkroi këtë rast si një dëshmi të përkushtimit të Shërbimit të Jashtëm dhe të përfaqësive diplomatike e konsullore për t'u gjendur pranë qytetarëve shqiptarë në çdo kohë dhe rrethanë.
Përditësime
Flotilja me 54 anije u ndalua më 18 maj në ujërat ndërkombëtare teksa transportonte ndihma për Gaza. Pjesëmarrësit u transferuan në Izrael, ku mediat publikuan video të ministrit izraelit të Sigurisë Kombëtare duke i tallur ata të gjunjëzuar, me koka të ulura dhe të prangosur. Autoritetet shqiptare theksuan komunikimin e vazhdueshëm me palën izraelite.