Alireza Tangsiri, komandanti i Marinës së Gardës Revolucionare Islamike, u vra në një sulm ajror në Bandar Abbas, sipas një zyrtari izraelit. Ai ishte figurë kyçe në strategjinë detare të Iranit, përfshirë përgjegjësinë për mbylljen e Ngushticës së Hormuzit, një nga rrugët kryesore të transportit të naftës në botë. Deri më tani nuk ka pasur reagim zyrtar nga autoritetet iraniane apo ushtria e Izraeli.
Tangsiri kishte karrierë të gjatë ushtarake. Ai shërbeu si komandant brigade gjatë Luftës Iran-Irak dhe më pas drejtoi Distriktin e Parë Detar të Marinës së Gardës Revolucionare në Bandar Abbas. Ai njihej për retorikën e ashpër ndaj Shteteve të Bashkuara. Në vitin 2007, deklaroi se forcat iraniane do t’i ndiqnin ato "deri në Gjirin e Meksikës" në rast përballjeje.
Më 23 gusht 2018, udhëheqësi suprem Ali Khamenei e emëroi komandant të Marinës së Gardës Revolucionare. Në vitin 2025, Tangsiri prezantoi projektin më të madh detar ushtarak të Iranit, një aeroplanmbajtëse të ndërtuar mbi bazën e një anijeje tregtare të ripërdorur.
Ai ishte subjekt sanksionesh amerikane. Në vitin 2019, Departamenti i Thesarisë i SHBA-së e shpalli "Terrorist Global të Caktuar Posaçërisht", duke ngrirë asetet dhe ndaluar marrëdhëniet biznesi me të. Në vitin 2024, u përfshi në sanksione të tjera për lidhje me një kompani iraniane të zhvillimit të dronëve.
Ngjarja vjen në një kohë tensionesh të larta në rajon dhe mund të ketë ndikim në sigurinë detare dhe tregjet globale të energjisë.