Futbollisti i Kombëtares shqiptare, Jasir Asani, ka rifilluar përgatitjet me skuadrën iraniane Esteghlal. Lojtari iu bashkua seancës së parë stërvitore pas një qëndrimi disa-javor në Shqipëri, ku gjatë kësaj kohe u stërvit edhe me ekipin e Partizanit.
Nëpërmjet një postimi në rrjetet sociale, 31-vjeçari shprehu kënaqësinë për kthimin e tij në Iran, duke e cilësuar rikthimin si një ndjesi të veçantë për shkak të kujtimeve me të ekipit. Pamjet e stërvitjes u konfirmuan zyrtarisht edhe nga klubi i Esteghlal.
Edhe pse Asani është aktualisht nën kontratë me klubin iranian, spekulimet për të ardhmen e tij kanë qenë të shpeshta. Disa javë më parë, emri i tij u përfol për një transferim të mundshëm te skuadra spanjolle Getafe. Megjithatë, deri në këtë moment nuk ka asnjë marrëveshje zyrtare apo zhvillim konkret në lidhje me këtë transferim, duke e mbajtur të paqartë vazhdimësinë e karrierës së tij.