Këngëtarja britanike Jessie J ka shënuar përvjetorin e parë të ndërhyrjes kirurgjikale të mastektomisë në anën e djathtë, të kryer pas diagnostikimit me kancer të gjirit. Përmes një videoje të publikuar në rrjetet sociale, të realizuar gjatë periudhës së rikuperimit, artistja ka reflektuar mbi këtë përvojë sfiduese që, siç theksoi ajo, e ka ndryshuar përgjithmonë.
Në mesazhin e saj ndërgjegjësues, 38-vjeçarja u ka kërkuar fansave të kryejnë kontrolle të rregullta të gjinjve dhe sqetullave, duke nënvizuar se diagnostikimi në fazë të hershme ka qenë vendimtar për trajtimin e saj. Këngëtarja shprehu gjithashtu mirënjohje për mjekun e saj, Dr. Gui, të cilin e cilësoi si një hero në betejën e saj.
Rrëfimi i artistes vjen vetëm një muaj pasi ajo njoftoi publikisht se është shëruar plotësisht nga kanceri. Publikimi është pritur me reagime të shumta mbështetëse nga fansat dhe kolegët e saj. Jessie J, e njohur për karrierën e saj muzikore dhe hite si “Price Tag”, vazhdon të jetë një figurë me ndikim në industrinë e muzikës pop.