Pas mbylljes së afatit kalimtar veror, sulmuesi argjentinas Julian Alvarez mbetet pjesë e Atletico Madridit. Trajneri Diego Simeone ka konfirmuar zyrtarisht rikthimin e lojtarit në skuadër, i cili do të jetë i gatshëm për përballjen e radhës ndaj Athletic Bilbaos.
Sipas Simeones, Alvarez është stërvitur mirë dhe klubi pret që ai të japë kontributin e tij maksimal. Trajneri theksoi se situata e krijuar gjatë verës duhet parë si një përvojë mësimore, duke shtuar se jeta është plot mundësi dhe lojtari tani ka një shans të ri për të treguar vlerat e tij përmes golave.
Situata e sulmuesit gjatë merkatos ishte mjaft e ndërlikuar, me zëra për transferime të mundshme te klube si Barcelona, Arsenal apo Real Madrid. Sipas burimeve të klubit, negociatat dështuan për shkak të mosmarrëveshjeve rreth mënyrës së zhvillimit të bisedimeve. Atletico Madrid mbajti një qëndrim të prerë, duke refuzuar çdo ofertë dhe duke akuzuar palët e interesuara për mungesë transparence dhe respekti në procesin e komunikimit.
Lojtari, i cili mungoi në katër seanca stërvitore dhe u përball me vërshëllimat e tifozëve në ndeshjen e parë të sezonit, tashmë pritet të fokusohet te objektivat e skuadrës. Pas ndeshjes në Bilbao, Atletico Madrid do të nisë përgatitjet për përballjen në Ligën e Kampionëve kundër Liverpoolit.