Mirlinda Karçanaj, ish-drejtoresha e Agjencisë Kombëtare të Sigurisë së Informacionit (AKSHI), u ftua mbrëmjen e së enjtes në emisionin Top Story me moderatore Grida Dumën në Top Channel.
Gjatë intervistës, ajo foli për ish-zëvendësin e saj Daniel Shima, 34 vjeç, i cili u denoncua i zhdukur për disa orë nga familjarët më 21 gusht 2025. Sipas njoftimit të policisë, Shima u paraqit rreth orës 02:00 në Komisariatin e Policisë Nr. 1 dhe deklaroi se ishte larguar me dëshirën e tij.
Karçanaj sqaroi se Daniel Shima ka qenë përgjegjës për të gjithë procesin administrativ të prokurimeve. «Unë kam qenë e përqendruar që të plotësohet procedura teknologjike për t’u bërë AKSHI ky që është sot», tha ajo.
Ajo theksoi se personalisht nuk është marrë me këtë proces, por e ka ndjekur me kujdes që të zbatohet brenda rregullave. Në një periudhë, Karçanaj e kishte deleguar autoritetin kontraktor te Shima dhe gjatë kësaj kohe nuk ka pasur komunikim në lidhje me procedurën.
Karçanaj shprehu se nuk dëshiron të paragjykojë Shimën për atë që thuhet në media, por insistoi që institucionet duhet të hetojnë me seriozitet. «Për të mirën flet vetë historia e AKSHI-së, ndërsa për të keqen do të duhet të presim fundin e hetimeve dhe vendimet e gjykatës», u shpreh ajo.