Katër cisterna me flamur iranian janë larguar nga Ngushtica e Hormuzit me ngarkesa të plota nafte, duke shënuar operacionin e parë të këtij lloji që nga mesi i prillit, kur u vendos bllokada amerikane ndaj porteve të Iranit. Sipas të dhënave nga kompania e monitorimit detar Kpler, anijet kishin ngarkuar naftën bruto në Ishullin Kharg, terminali kryesor i eksporteve të vendit, përmes të cilit realizohet rreth 90 për qind e eksporteve të Republikës Islamike.
Anijet në fjalë, të identifikuara si Hilda I, Amber, Silvia I dhe Happiness I, kaluan përmes ngushticës të hënën me sistemet AIS (Sistemi Automatik i Identifikimit) të fikura, një masë për të shmangur gjurmimin. Zakonisht, këto cisterna transportojnë naftën drejt zonave detare pranë Malajzisë dhe Singaporit, ku kryhen transferime nga anija në anije përpara dërgimit te blerësit përfundimtarë, të cilët shpesh janë në Kinë.
Operacionet detare iraniane u pezulluan më 13 prill, pas vendimit të Uashingtonit për bllokadë, si kundërpërgjigje ndaj kufizimeve të vendosura nga Teherani në zonën e Hormuzit. Përveç këtyre katër cisternave, Kpler bën të ditur se tre të tjera kishin tentuar thyerjen e bllokadës më 15 prill.
Në të njëjtën kohë, ushtria amerikane vazhdon zbatimin e masave ndaluese. Të martën, autoritetet amerikane njoftuan se kanë “neutralizuar” një cisternë të zbrazët, duke goditur dhomën e motorit për ta penguar mbërritjen në Ishullin Kharg. Kjo është anija e gjashtë që pëson dëme gjatë operacioneve ushtarake për zbatimin e bllokadës detare.