Një aksident me pasoja tragjike ka ndodhur gjatë natës në qarkoren Radishan-Prishtinë-Mirkovcë afër Shkupit. Katër persona që ndodheshin brenda një veture të tipit BMW humbën jetën pas përplasjes me një kamion me targa të Kosovës.
Përplasja ishte aq e fortë sa automjeti BMW u përfshi menjëherë nga flakët dhe u shkrumbua pothuajse tërësisht. Katër personat brenda tij nuk arritën të shpëtojnë. Kamioni doli jashtë rrugës dhe ndaloi pranë anës së qarkores.
Drejtuesi i kamionit mbijetoi. Sipas burimeve paraprake, dyshohet se ai kishte humbur vetëdijen nga lodhja dhe kishte kaluar në korsinë e kundërt. Forca të shumta policie, zjarrfikës dhe ekipe emergjente mbërritën në vendngjarje.
Zona ku ndodhi aksidenti mbetet e bllokuar nga policia. Hetimet vazhdojnë për të zbardhur shkaqet dhe rrethanat e ngjarjes. Identifikimi i viktimave pritet të bëhet përmes procedurave të mjekësisë ligjore.
Përditësime
Policia e Shtetit identifikoi viktimat: Riste Velkov, 51 vjeç, shoferi i BMW-së me targa të Shkupit, dhe djali i tij A.V., 20 vjeç, si dhe P.M. dhe M.GJ., të dy 20 vjeç. B.B., 76 vjeç nga Kosova, u arrestua si shoferi i kamionit. Kamioni kaloi gardhin metalik ndarës dhe hyri në korsinë e kundërt për shkak të lodhjes.