Katër persona u arrestuan në qytetin e Korçës pas hetimeve intensive disa mujore të Prokurorisë pranë Gjykatës së Shkallës së Parë të Juridiksionit të Përgjithshëm Korçë, në bashkëpunim me Drejtoria Vendore për Kufirin dhe Migracionin Korçë. Arrestimi ndodhi teksa ata po shkarkonin mallra të dyshuara kontrabandë në një ambient magazinimi. Të arrestuarit, me iniciale V.N., A.N., A.L. dhe S.N., akuzohen për veprat penale "Kontrabanda me mallra të tjera" (neni 174), "Tregtimi dhe transportimi i mallrave që janë kontrabandë" (neni 178) dhe "Ruajtja ose depozitimi i mallrave kontrabandë" (neni 179) të Kodit Penal, të kryera në bashkëpunim.
Hetimet proaktive përfshinin vëzhgime të fshehta, monitorim lëvizjesh dhe teknika speciale hetimore, në kuadër të procedimit penal nr. 438/2026. U zbulua një skemë e mirëorganizuar ku V.N. dhe A.N., në bashkëpunim me të tjerë, transportonin konfeksione nga Greqia në Shqipëri. Ata udhëtonin me automjete të përshtatura, të cilave u ishin hequr sediljet e pasme për të rritur kapacitetin dhe për të shmangur dyshimet.
Mallrat siguroheshin në Greqi, liheshin pranë vijës kufitare dhe transportoheshin ilegalisht përmes kufirit të gjelbër nga bashkëpunëtorë. Në disa raste, organizatorët i merrnin vetë në zonat kufitare, ndërsa në të tjera i çonin me mjete në Korçë, ku i magazinonin dhe i hidhnin në treg përmes subjektit tregtar të administruar nga A.N. dhe V.N..
Gjatë operacionit u sekuestruan:
- 15 thasë me 1632 copë veshje;
- 73 thasë të tjerë dhe mallra rifuxho me peshë 1357 kg;
- Automjete të modifikuara pa sedilje;
- Celularë dhe dokumente të ndryshme lidhur me aktivitetin kriminal.
Hetimet vazhdojnë për identifikimin e personave të tjerë të përfshirë në skemë.