Policia e Kosovës ka dhënë detaje për një përleshje fizike të ndodhur më 26 shkurt 2026, rreth orës 20:40, në rrugën "Vëllezërit Gërvalla", lagjën Bregu i Diellit në Prishtinë.
Ngjarja nisi si mosmarrëveshje verbale mes katër personave, të gjithë meshkuj dhe shtetas të Afganistanit, e cila eskaloi në konflikt fizik. Gjatë përleshjes dyshohet se u përdor një thikë si mjet i ftohtë.
Si pasojë, dy nga të dyshuarit pësuan lëndime trupore dhe pranuan trajtim mjekësor. Në vendin e ngjarjes, policia sekuestroi një thikë, e cila dyshohet se u përdor gjatë incidentit.
Pas intervistimit, me vendim të prokurorit, të katër të dyshuarit u dërguan në mbajtje. Rasti po hetohet për veprimet penale "Lëndim i lehtë trupor" dhe "Armëmbajtje pa leje".