Instituti Demokratik i Kosovës (KDI) ka reaguar ndaj mënyrës së zhvillimit të mbledhjes së Komisionit për Legjislacion, duke vlerësuar se shqyrtimi dhe votimi në parim i pakos së projektligjeve për reformën në drejtësi është bërë në kundërshtim me Rregulloren e Punës së Kuvendit.
Sipas KDI, neni 34 (4) i Rregullores kërkon që mbledhja e komisionit të thirret të paktën tri ditë pune para mbajtjes së saj. Mirëpo, deputetët i kanë pranuar materialet prej qindra faqesh vetëm një natë përpara, pa dhënë ndonjë arsyetim për këtë përshpejtim të procedurave. Instituti thekson se neni 74 (1) i Rregullores, i cili kërkon një afat prej dy javësh nga shpërndarja e projektligjeve deri te leximi i parë në seancë plenare, i linte hapësirë komisionit për të zhvilluar shqyrtimin në mënyrë të rregullt.
Një tjetër pikë kritike nga KDI ka qenë mungesa e ministres përgjegjëse gjatë procesit të votimit. Ndonëse kjo nuk përbën një shkelje të drejtpërdrejtë procedurale, KDI vlerëson se për një nismë me rëndësi të tillë për integritetin dhe llogaridhënien në sistemin e drejtësisë, prania e ministres për të prezantuar propozimet dhe për t'iu përgjigjur pyetjeve të deputetëve do të ishte e domosdoshme.
Në mbledhjen e sotme të Komisionit për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë për Parandalimin e Korrupsionit, përveç pesë projektligjeve të reformës, kaloi edhe Projektligji për Byronë Shtetërore për Verifikimin dhe Konfiskimin e Pasurisë së Pajustifikueshme. KDI u ka bërë thirrje anëtarëve të komisionit që fazat e ardhshme të shqyrtimit të kryhen duke respektuar plotësisht procedurat parlamentare dhe duke përfshirë akterët e interesuar.