Këshilli i Emërimeve në Drejtësi (KED) zhvilloi më 15 prill 2026 mbledhjen e radhës në ambientet e Gjykatës së Lartë dhe vendosi ndalimin e kandidimit të Alaudin Malajt për vendin vakant të gjyqtarit në Gjykatën Kushtetuese.
Ky vend u mor pas prezantimit të relacioneve nga relatorët për kandidatët që aplikuan për vendet vakante të shpallura nga Institucioni i Presidentit të Republikës më 31 tetor 2025. Vend vakanti lidhet me zëvendësimin e gjyqtares Sonila Bejtja, emëruar nga Presidenti Begaj.
Alaudin Malaj, ish-kryetar i Gjykatës së Apelit të Tiranës, pesë vite më parë dha dorëheqje para procesit të vettingut. Komisioni i Pavarur i Kualifikimit (KPK) pranoi dorëheqjen dhe vendosi ndalimin e emërimit të tij në sistemin e drejtësisë për një periudhë 15-vjeçare.
KED caktoi relatore Ornela Naqellarin për shqyrtimin e kandidatëve Alaudin Malaj dhe Alban Toro. Midis kandidatëve të tjerë të dërguar nga Presidenti janë:
- Alban Toro
- Alma Faskaj Vokopola
- Arta Vorpsi
- Brunilda Bara
- Genci Gjonçaj
- Jordan Daci
- Lulzim Hamitaj
- Naureda Llagami
- Roland Ilia
KED do të vazhdojë shqyrtimin e kandidatëve për këtë pozicion, si dhe për vendin vakant të shpallur nga Kuvendi për zëvendësimin e gjyqtares Elsa Toska. Në të kaluarën, Malaj bashkë me gjyqtarën Shpresa Beçaj kanë gjykuar çështjen e ish-kryedemokratit Lulzim Basha për akuzat e lobimit me para ruse, ku vendosën pushimin e dosjes më 15 maj 2020.