Korporata Energjetike e Kosovës (KEK) ka nisur remontin e rregullt vjetor 30-ditor të njësisë B2 në Termocentralin Kosova B. Ky proces zhvillohet në përputhje me Bilancin Vjetor Energjetik dhe është pjesë e planifikimit të rregullt operativ.
Qëllimi kryesor është mirëmbajtja teknike, rritja e sigurisë në operim dhe garantimi i funksionimit të qëndrueshëm të njësisë B2.
Ndërkohë, njësia B1 i është nënshtruar projekteve madhore të modernizimit, përfshirë ndërtimin e elektrofiltrave dhe sistemit DeNOx. Këto kanë filluar në prill dhe priten të përfundojnë në fillim të dhjetorit. Pas investimeve, pritet rritje e sigurisë së operimeve, zgjatje e jetëgjatësisë për rreth 20 vite dhe funksionim sipas standardeve më të larta të Bashkimit Evropian për mbrojtjen e mjedisit.
Raportohet se paraditen e së shtunës kanë rënë blloqet B1 dhe B2, ndërkohë që KEK nuk ka dhënë njoftim zyrtar për këtë ngjarje.