Korporata Energjetike e Kosovës (KEK) ka filluar zbatimin e planit për mirëmbajtjen vjetore të njësisë A4 në Termocentralin Kosova A. Procesi ka nisur me ndaljen e planifikuar dhe të kontrolluar të njësisë nga ora 00:00, pas përfundimit të të gjitha përgatitjeve të nevojshme nga ekipet teknike dhe profesionale të ndërmarrjes.
Sipas njoftimit zyrtar të KEK-ut, ky remont është një ndër aktivitetet më të rëndësishme të planifikuara për këtë vit. Ndërhyrja ka për qëllim inspektimin, riparimin dhe sanimin e pajisjeve kryesore, me synim që të rritet siguria dhe efikasiteti i operimit të njësisë deri në remontin e radhës. Ky hap është ndërmarrë edhe për të përgatitur kapacitetet gjeneruese për periudhat kur kërkesa për energji elektrike shënon rritje, duke u mbështetur në standardet e sigurisë operative.
KEK theksoi se realizimi i këtyre aktiviteteve vjen në përputhje me Bilancin Vjetor të Energjisë Elektrike (BVEE). Kompania bëri të ditur se, krahas këtyre ndërhyrjeve në Kosova A, po vazhdon edhe zbatimi i projekteve për modernizimin e kapaciteteve gjeneruese në Termocentralin Kosova B, me qëllim garantimin e një prodhimi të qëndrueshëm dhe të besueshëm të energjisë për vendin.