Pas një angazhimi intensiv të stafit teknik, Njësia A3 e Termocentralit Kosova A ka rifilluar punën, duke u sinkronizuar me sistemin elektroenergjetik në orën 10:00. Rikthimi në operim u bë i mundur pas sanimit të rrjedhjeve në sistemin gypor të kaldajës dhe përfundimit të ndërhyrjeve të tjera teknike.
Sipas njoftimit të KEK-ut, njësia operon në gjendje stabile dhe kapacitetet e saj janë nominuar tashmë në sistem, duke forcuar sigurinë e furnizimit me energji elektrike.
Programi investiv i KEK-ut
Paralelisht me operimet e përditshme, Korporata Energjetike e Kosovës po zbaton programin më të madh investiv në katër dekadat e fundit, me projekte strategjike në vlerë prej qindra milionë eurosh. Në fokus janë:
- Modernizimi i njësive B1 dhe B2 në Termocentralin Kosova B.
- Rehabilitimi dhe modernizimi i thellë i Njësisë A3 në Termocentralin Kosova A.
- Zhvillimi i projektit të parkut solar me kapacitet prej 100 MW.
Këto investime synojnë rritjen e efikasitetit operacional, forcimin e sigurisë energjetike dhe krijimin e një të ardhmeje më të qëndrueshme dhe më të gjelbër për vendin.