Korporata Energjetike e Kosovës (KEK sh.a.) ka njoftuar se rreth orës 18:40 të datës 15 janar 2026, ka vepruar reléja mekanike e Buchholz-it e bllok-transformatorit energjetik 15.75/220 kV, 240 MVA. Si pasojë, njësia A3 u ndal përkohësisht nga operimi, në përputhje me standardet dhe parametrat e sigurisë teknike.
Ekipet profesionale dhe teknike të KEK sh.a. po kryejnë verifikimet dhe kontrollimet e nevojshme për të identifikuar shkakun dhe për të ndërmarrë masat e duhura për sanimin e situatës, sipas procedurave teknike operative.
Operimi i sistemit elektroenergjetik vazhdon në mënyrë të qëndrueshme dhe të kontrolluar. Aktualisht, funksionojnë katër njësi gjeneruese: A4, A5, B1 dhe B2, në përputhje me planin e prodhimit dhe bilancin energjetik të aprovuar.
Njësia e pestë aktivizohet sipas nevojës dhe parametrave teknikë, për të adresuar rritjen e konsumit, pa cenuar stabilitetin dhe sigurinë operative.
KEK sh.a. falënderoi stafin teknik dhe punonjësit për reagimin profesional dhe angazhimin në garantimin e operimit të sigurt të kapaciteteve prodhuese.