Korporata Energjetike e Kosovës (KEK) ka njoftuar se Njësia A3 ka rifilluar operimin pas përfundimit të sanimeve dhe ndërhyrjeve teknike pas ndaljes së përkohshme.
Njësia u startua dhe u sinkronizua me rrjetin elektroenergjetik rreth orës 06:47, duke respektuar standardet operacionale dhe parametrat e sigurisë. Me këtë rikthim, KEK operon me pesë njësi gjeneruese aktive: A3, A4, A5, B1 dhe B2, për aq kohë sa lejojnë parametrat operacionalë.
Kjo gjendje garanton vazhdimësinë e prodhimit, stabilitetin dhe qëndrueshmërinë e sistemit elektroenergjetik të Kosovës. KEK ka vlerësuar profesionalizmin e ekipeve teknike dhe menaxhuese për kryerjen e ndërhyrjeve preventive dhe riparimeve në kohë optimale, si dhe ka falënderuar stafin për reagimin e shpejtë dhe përkushtimin.
Sipas burimeve, para këtij zhvillimi kishte pasur reduktime të energjisë elektrike në Kosovë për shkak të mosmjaftueshmërisë së nominimeve nga KESCO dhe tejkalimit të kërkesës nga prodhimi vendor. KOSTT ka bërë thirrje për parashikime të sakta të nevojave për të shmangur devijimet dhe për të ruajtur sigurinë e sistemit.