Korporata Energjetike e Kosovës (KEK) ka njoftuar se Njësia B2 ka përfunduar sanimet dhe ekzaminimet e pajisjeve kryesore sipas planit të parashikuar. Njësia u startua me sukses dhe u sinkronizua me rrjetin elektroenergjetik rreth orës 20:26 më 20 janar 2026, duke garantuar vazhdimësinë e prodhimit dhe stabilitetin e sistemit.
Ky rezultat dëshmon përkushtimin e KEK-ut për operim të sigurt, efikas dhe të qëndrueshëm të kapaciteteve prodhuese, si dhe aftësinë e ekipeve teknike dhe menaxhuese për të kryer ndërhyrje preventive dhe riparime në kohë optimale.
KEK falënderoi stafin teknik dhe punonjësit për profesionalizmin, përkushtimin dhe punën e palodhur, të cilët mundësuan rifillimin pa vonesa dhe në përputhje me standardet më të larta operacionale. Korporata u angazhua për vazhdimësinë e prodhimit, stabilitetin dhe besueshmërinë e sistemit elektroenergjetik të Kosovës.
Ndërkohë, të martën në mëngjes një pjesë e vendit u përball me reduktime energjie. Kompania për Distribuim të Energjisë Elektrike (KESCO) njoftoi se këto u rikthyen për shkak të kushteve të vështira dimërore, temperaturave të ulëta dhe rritjes së konsumit për ngrohje.