Korporata Energjetike e Kosovës (KEK) njofton se Njësia B1 është rikthyer në operim të mërkurën nga ora 15:00 dhe funksionon në gjendje të qëndrueshme teknike, në përputhje me parametrat e sigurisë.
Me këtë rikthim, KEK operon me katër njësi prodhuese, çka përfaqëson kapacitet të plotë prodhues dhe garanton stabilitet të sistemit elektroenergjetik në Kosovë.
Ndalesa e përkohshme e Njësia B1 erdhi për shkak të rrjedhjeve të avullit në sistemin e gypave brenda kaldajës. Problemi u adresua me ndërhyrje teknike profesionale dhe sanime të planifikuara, pa rrezikuar sigurinë e njësisë.
Operatori i Sistemit, Transmisionit dhe Tregut të Energjisë Elektrike (KOSTT) vlerësoi veprimet e shpejta dhe efikase të KEK-ut, të cilat rritën prodhimin vendor dhe siguruan vazhduesinë e furnizimit si dhe integritetin e sistemit.
KEK sqaron se përgjegjësitë në sektorin energjetik janë të ndara me ligj që nga viti 2013. Korporata është përgjegjëse vetëm për eksploatimin e thëngjillit dhe prodhimin e energjisë elektrike e termike, ndërsa furnizimi i konsumatorëve të rregulluar i takon kompanisë përkatëse të furnizimit.
Të martën ishte njoftuar se do të kishte reduktime të energjisë elektrike për shkak të mbingarkesës së rrjetit.