Korporata Energjetike e Kosovës (KEK) ka njoftuar zyrtarisht rikthimin në operim të njësisë A3, pas përfundimit të suksesshëm të të gjitha aktiviteteve të planifikuara në kuadër të remontit vjetor. Ky proces u pasua nga startimi i njësisë dhe sinkronizimi i saj me rrjetin elektrik të vendit.
Sipas njoftimit të KEK-ut, njësia aktualisht është në operim të rregullt, gjendja operative është stabile dhe parametrat teknikë ndodhen brenda vlerave të planifikuara. Korporata u ka shprehur mirënjohje ekipeve profesionale dhe teknike të angazhuara, duke vlerësuar profesionalizmin dhe përkushtimin e tyre gjatë gjithë periudhës së punimeve, të cilat mundësuan përfundimin me sukses të aktiviteteve dhe kthimin e njësisë në rrjet.