Korporata Energjetike e Kosovës (KEK) ka njoftuar se Njësia A4 ka filluar procesin e rikthimit në rrjetin elektroenergjetik, pas përfundimit me sukses të sanimeve të nevojshme teknike të kryera nga ekipet profesionale.
Sipas njoftimit, procesi i startimit tashmë është në zhvillim e sipër dhe sinkronizimi i njësisë me rrjetin pritet të realizohet së shpejti. KEK ka sqaruar se për arsye teknologjike, gjatë kësaj faze të vënies në punë, banorët e Komunës së Obiliqit mund të vërejnë tym më të theksuar nga termocentrali për një periudhë prej disa orësh. Institucioni ka kërkuar mirëkuptimin e qytetarëve për këtë dukuri të përkohshme, e cila është e pashmangshme gjatë procesit teknik të rikthimit në operim.
Njësia A4 ishte ndalur për operim më datën 11 gusht, pas evidentimit të problemeve teknike që kërkonin ndërhyrje për krijimin e kushteve të sigurta për prodhimin e energjisë.